މޯލްޑިވްސް ކަރެކްޝަނަލް ސަރވިސް (އެމްސީއެސް) އިން ކ. ހިންމަފުށީގައި ޤާއިމްކޮށްފައިވާ އައްސޭރި ޖަލުގައި މިއަދު މިސްކިތެއް ހުޅުވައިފިއެވެ.
މަސްޖިދުލް ޔޫސުޕް ހުޅުވުމަށް މިއަދު ބޭއްވި ހާއްސަ ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އޮނަރަބަލް ޢަބްދުﷲ ފަޔާޟްއެވެ. އެ މަނިކުފާނުގެ އިތުރުން ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ކެބިނެޓް އެފެއާޒް އޮނަރަބަލް އަޙްމަދު ޢަލީ ޙަބީބް، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އޮނަރަބަލް ޢަލީ އިޙުސާން، މިނިސްޓަރ އޮފް އެޑިޔުކޭޝަން އޮނަރަބަލް ޑޮކްޓަރ އިސްމާޢީލް ޝަފީޢު، ބަންޑާރަ ނައިބު އަލްއުސްތާޛު އަޙްމަދު އުޝާމް، ކޮމިޝަނަރ އޮފް ޕްރިޒަންސް ޙަސަން ޒަރީރު، ޑެޕިއުޓީ ކޮމިޝަނަރ އޮފް ޕްރިޒަންސް އުސްތާޛް އިބްރާހިމް މުޙައްމަދު ދީދީ، ކޮމިޝަންޑް އޮފިސަރުން އަދި ދައުވަތު އެރުވި މެހެމާނުން ހިމެނެއެވެ.
ހެޔޮ އެދޭ ފަރާތްތަކުގެ އެހީއާއެކު މަސްޖިދުލް ޔޫސުފް ބިނާކުރުމުގެ މަސައްކަތް 2022 ވަނަ އަހަރުގެ 22 އޮގަސްޓްގައި ފަށާފައިވާއިރު، ހުއްދަތައް ލިބިގެން އަމަލީގޮތުން މަސައްކަތް ފަށާފައިވަނީ 17 އޮގަސްޓް 2023 ގައެވެ. 130 މީހުންގެ ޖާގައިގެ މަސްޖިދުލް ޔޫސުފް ބިނާކުރުމުގެ މަސައްކަތްކޮށްފައިވަނީ އައްސޭރި ޖަލުގެ ޤައިދީންނާއި ޕްރިޒަން އޮފިސަރުންނެވެ.
މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އޮނަރަބަލް ޢަލީ އިޙުސާންގެ ވާހަކަފުޅުގައި، ހެޔޮ އެދޭ ވިޔަފާރިވެރިންނާއި ވަރަށް ގިނަ ފަރުދުންގެ ދީލަތި އެހީއާއެކު މި މިސްކިތް އެޅިފައިވާ ކަމަށް ފާހަގަކުރައްވާ، އެ ފަރާތްތަކަށާއި ހިންމަފުށީ ކައުންސިލަށް ޝުކުރުއަދާކުރެއްވިއެވެ. އަދި އައްސޭރި ޖަލުގެ ޑައިރެކްޓަރަށާއި ހީވާގި އޮފިސަރުންނަށާއި ޤައިދީންނަށްވެސް ޝުކުރުއަދާކުރެއްވިއެވެ. މި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ އޮފް ޕްރިޒަންސް ޙަސަން ޒަރީރުގެ ވާހަކަފުޅުގައި ފާހަގަކުރެއްވީ މީގެ ކުރިން އައްސޭރި ޖަލުގައި ނަމާދުކުރުމުގެ ކަންތައްތައް ކުރިއަށްދިޔައީ މަސައްކަތްކުރާ ތަނުގައެވެ. އަދި ޖާގަ ތަންދޭގޮތުން އެކަކު ނަމާދުކޮށް ނިމެންދެން އަނެކަކު ބައެއް ފަހަރު މަޑުކުރަންޖެހޭކަމަށެވެ. އަދި މި މިސްކިތުގެ ސަބަބުން އެ މަސައްލަ ހައްލުކުރެވިގެންދާނެއެވެ.
